ពន្ធ និង អាករ « អគ្គនាយកដ្ឋានគយនិងរដ្ឋាករកម្ពុជា

ប្រព្រឹត្តកម្មធម្មតា

ពន្ធ និងអាករ ត្រូវប្រមូលលើទំនិញនាំចេញ នាំចូល មុនពេលបញ្ចេញទំនិញទាំងនេះពីគយ លើកលែងតែក្នុងករណីពិសេស ដែលពន្ធ និងអាករត្រូវបានព្យួរ។

ប្រភេទពន្ធ និងអាករប្រមូលដោយគយមានដូចខាងក្រោម៖

លរ.	ប្រភេទពន្ធនិងអាករ	អត្រាពន្ធ
I. នាំចូល
១	ពន្ធគយ	០%; ៧%; ១៥%; ៣៥%
២	អាករពិសេស	០%; ៤,៣៥%; ៥%; ១០%; ១៥%; ២៥%; ៣០%; ៤៥%; ៥០%
៣	អាករបន្ថែម	០,០២$/លីត្រ លើប្រេងសាំង, ០,០៤$/លីត្រ ចំពោះប្រងម៉ាស៊ូត
៤	អាករលើតម្លៃបន្ថែម	១០%
II. នាំចេញ
១	អាករនាំចេញ	០%, ៥%, ១០%, ១៥%, ២០%, ៥០%

ប្រភព៖ តារាងពន្ធគយឆ្នាំ២០១២ បោះពុម្ពលើកទី៣ ខែមករា ឆ្នាំ២០១៥

ប្រព័ន្ធអនុគ្រោះពន្ធ

ក្របខ័ណ្ឌកិច្ចព្រមព្រៀង	កម្មវិធីអនុវត្តន៍
ពាណិជ្ជកម្មទំនិញអាស៊ាន(ATIGA)	ច្បាប់និងបទប្បញ្ញតិ្តពាក់ព័ន្ធ ព្រះរាជក្រមលេខ០៨/០៩.០១៧ចុះថ្ងៃទី២៩ ខែសីហា ឆ្នាំ២០០៩· ប្រកាសលេខ ២៨៨ សហវ ចុះថ្ងៃទី៣១ ខែមិនា ឆ្នាំ២០១១ ស្ដីពី ការអនុញ្ញាតឲ្យប្រើកម្មវិធី កាត់បន្ថយ ឬ លុបពន្ធនាំចូល របស់កម្ពុជាក្រោមកិច្ចព្រមព្រៀងពាណិជ្ជកម្មទំនិញអាស៊ាន។ ប្រទេសកម្ពុជាត្រូវលុបពន្ធនាំចូលលើគ្រប់ផលិតផលទាំងអស់ត្រឹមឆ្នាំ២០១៥ ដោយមានភាពទន់ភ្លន់ដល់ឆ្នាំ២០១៨ តាមរយៈកម្មវិធីដូចខាងក្រោម ៖ ៨០%នៃបន្ទាត់ពន្ធគយសរុបត្រូវបញ្ចុះមកនៅត្រឹម ០-៥% ត្រឹមថ្ងៃទី០១ ខែមករា ឆ្នាំ២០០៩ ពន្ធនាំចូលលើផលិតផល Information and Communication Technology-ICT ត្រូវបញ្ចុះមក០%ចាប់ពីថ្ងៃទី០១ ខែមករា ឆ្នាំ២០១០ ពន្ធនាំចូលលើផលិតផលកសិកម្មមិនទាន់កែច្នៃ នៅក្នុងបញ្ជីវេទយិត SLត្រូវកាត់បន្ថយ ឬ លុបមក ០-៥% នៅឆ្នាំ២០១៧។ ពន្ធនាំចូលលើផលិតផលកសិកម្មមិនទាន់កែច្នៃនៅក្នុងបញ្ជីវេទយិតខ្ពស់ HSLត្រូវអនុវត្តតាមអត្រា MFN ជាធរមាន។ ពន្ធនាំចូលលើផ្នែកសមាហរណកម្មអាទិភាព Priority Integration Sector-PIS ត្រូវលុបមក០%នៅឆ្នាំ២០១២ ពន្ធនាំចូលលើផ្នែកសមាហរណកម្មអាទិភាព Priority Integration Sector-PIS Negative List PIS-NL ត្រូវលុបមក០%នៅឆ្នាំ២០១៥។ ព្រះរាជាណាចក្រកម្ពុជាអាចរក្សាទុកអត្រាពន្ធ ៥% ចំនួន ៧% នៃបន្ទាត់ពន្ធគយសរុប ឬ ស្មើនឹង ៦៦២ បន្ទាត់ពន្ធរហូតដល់ឆ្នាំ២០១៨។
កិច្ចសហប្រតិ្តបត្តិការ សេដ្ឋកិច្ចទូលំទូលាយរវាងអាស៊ាន និងសាធារណរដ្ឋប្រជាមានិតចិន (ACFTA)	ច្បាប់និងបទប្បញ្ញតិ្តពាក់ព័ន្ធ ព្រះរាជក្រមលេខ ១២០៧/០៣៣ ចុះថ្ងៃទី០៨ ខែធ្នូ ឆ្នាំ២០០៧ ប្រកាសលេខ ៦៤៥ សហវ ចុះថ្ងៃទី២២ ខែសីហា ឆ្នាំ២០០៨ ស្តីពីការអនុញ្ញាតឲ្យប្រើកម្មវិធីកិច្ចព្រមព្រៀងរបស់ព្រះរាជាណាចក្រកម្ពុជាស្តីពីកិច្ចសហប្រតិ្តបត្តិការសេដ្ឋកិច្ចទូលំទូលាយរវាងអាស៊ាន និងសាធារណរដ្ឋប្រជាមានិតចិន។ ផ្លូវធម្មតា ៥០%នៃបន្ទាត់ពន្ធគយសរុបត្រូវបន្ថយមក០-៥% ត្រឹមថ្ងៃទី០១ ខែមករា ឆ្នាំ២០១២ និង បន្តលុបពន្ធគយរហូតត្រឹមថ្ងៃទី០១ ខែមករា ២០១៥ ដោយមានភាពទន់ភ្លន់ដល់ឆ្នាំ២០១៨។ បញ្ជីវេទយិត ប្រទេសកម្ពុជាអាចរក្សាទុក ៥០០ បន្ទាត់ពន្ធគយក្នុងបញ្ជី SL ដោយបញ្ចុះមក ០-៥% មុនថ្ងៃទី០១ ខែមករា ឆ្នាំ២០២០ បញ្ជីវេទយិតខ្ពស់ ប្រទេសកម្ពុជាអាចរក្សាទុកមិនលើសពី ៤០%នៃបន្ទាត់ពន្ធសរុបក្នុងបញ្ជីវេទយិតភាពខ្ពស់
កិច្ចសហប្រតិ្តការសេដ្ឋកិច្ចទូលំទូលាយ រវាងអាស៊ាន និងសាធារណរដ្ឋកូរ៉េ(AKFTA)	ច្បាប់និងបទប្បញ្ញតិ្តពាក់ព័ន្ធ ព្រះរាជក្រមលេខ ១២០៧/០៣៤ ចុះថ្ងៃទី០៨ ខែធ្នូ ឆ្នាំ២០០៧ ប្រកាសលេខ ៦១៣សហវ ចុះថ្ងៃទី១៣ ខែសីហា ឆ្នាំ២០០៨ ស្តីពីការអនុញ្ញាតឲ្យ ប្រើកម្មវិធីកិច្ចព្រមព្រៀងស្តីពីកិច្ចសហប្រតិ្តការសេដ្ឋកិច្ចទូលំទូលាយរវាងអាស៊ាននិងសាធារណរដ្ឋកូរ៉េ។ ផ្លូវធម្មតា ប្រទេសកម្ពុជាត្រូវកាត់បន្ថយយ៉ាងតិច៥០%នៃបន្ទាត់ពន្ធគយសរុប ដែលស្ថិតនៅក្នុងផ្លូវធម្មតាមក០-៥%មិនឲ្យយឺតជាងខែមករា ឆ្នាំ២០១៥ និង៩០%នៃបន្ទាត់ពន្ធត្រូវលុបឲ្យបានមុនខែមករា ឆ្នាំ២០១៧។ បន្ទាត់ពន្ធទាំងអស់ក្នុងបញ្ជី NTត្រូវបញ្ចុះមក ០% ឲ្យបានមុនខែមករា ២០១៨ ដោយមានភាពទន់ភ្លន់ដល់ឆ្នាំ២០២០។ បញ្ជីវេទយិត ប្រទេសកម្ពុជាត្រូវកាត់បន្ថយអត្រាពន្ធគយដែលស្ថិតនៅក្នុងបញ្ជីវេទយិតដល់២០% មិនឲ្យយូរជាងថ្ងៃទី០១ ខែមករា ឆ្នាំ២០២០។ បន្ទាត់ពន្ធទាំងអស់ក្នុងបញ្ជី SLត្រូវកាត់បន្ថយជាបន្តបន្ទាប់មក០-៥% មុនថ្ងៃទី០១ ខែមករា ឆ្នាំ២០២៤។ បញ្ជីវេទយិតខ្ពស់ ប្រទេសកម្ពុជាត្រូវកាត់បន្ថយអត្រាពន្ធគយស្ថិតនៅក្នុងបញ្ជីវេទយិតភាពខ្ពស់ មិនលើស៥០% នៃបន្ទាត់ពន្ធសរុបឲ្យបានមុនថ្ងៃទី០១ ខែមករា ឆ្នាំ២០២៤
ភាពជាដៃគូសេដ្ឋកិច្ចទូលំទូលាយរវាង ប្រទេសជាសមាជិកអាស៊ាននិងប្រទេសជប៉ុន(AJCEP)	ច្បាប់និងបទប្បញ្ញតិ្តពាក់ព័ន្ធ ព្រះរាជក្រមលេខ ១០០៩/០១៩ ចុះថ្ងៃទី២២ ខែកញ្ញា ឆ្នាំ២០០៩ ប្រកាសលេខ ១៣៧៦ សហវ ចុះថ្ងៃទី៣០ ខែធ្នូ ឆ្នាំ២០០៩ ស្តីពីការអនុញ្ញាតឲ្យ ប្រើប្រាស់កម្មវិធីកិច្ចព្រមព្រៀងស្តីពីភាពជាដៃគូសេដ្ឋកិច្ចទូលំទូលាយរវាងប្រទេសជាសមាជិកអាស៊ាននិងប្រទេសជប៉ុន តាមកម្មវិធីដូចខាងក្រោម។ ផ្លូវធម្មតាទី១ អត្រាពន្ធគយស្តិតក្នុងបញ្ជី NT1ត្រូវបន្ថយមក ០% នៅថ្ងៃទី០១ ខែមករា ឆ្នាំ២០១០ ផ្លូវធម្មតាទី២ ៤០%នៃបន្ទាត់ពន្ធគយត្រូវកាត់បន្ថយដល់៥% ត្រឹមឆ្នាំ២០២០ និង៩០%នៃបន្ទាត់ពន្ធគយត្រូវលុបត្រឹមឆ្នាំ២០២៣ ហើយ ១០០%នៃបន្ទាត់ពន្ធគយត្រូវលុបត្រឹមឆ្នាំ២០២៦។ បញ្ជីវេទយិតខ្ពស់ ឬ ប្រភេទ C ប្រទេសកម្ពុជាត្រូវដាក់៤%នៃបន្ទាត់ពន្ធគយក្នុងប្រភេទ C ឬ បញ្ជីវេទយិតខ្ពស់។ បញ្ជីវេទយិតឬ ប្រភេទ R ប្រទេសកម្ពុជាត្រូវដាក់៨%នៃបន្ទាត់ពន្ធគយក្នុងប្រភេទ R ឬ បញ្ជីវេទយិត។ បញ្ជីលើកលែង ឬ ប្រភេទ X ប្រទេសកម្ពុជាត្រូវដាក់៣%នៃបន្ទាត់ពន្ធក្នុងបញ្ជីលើកលែង។
តំបន់ពាណិជ្ជកម្មសេរីអាស៊ាន –អូស្រ្តាលី –ណូវ៉ែលហ្សេឡង់(AANZFTA)	ច្បាប់និងបទប្បញ្ញតិ្តពាក់ព័ន្ធ ព្រះរាជក្រមលេខ ១០១០/០១៦ ចុះថ្ងៃទី២៩ ខែកញ្ញា ឆ្នាំ២០១០ ប្រកាសលេខ ១១៩៩ សហវ.ប្រក ចុះថ្ងៃទី២៩ ខែធ្នូ ឆ្នាំ២០១០ ស្ដីពីការអនុញ្ញាតឲ្យ ប្រើប្រាស់កម្មវិធីកាត់បន្ថយឬ លុបពន្ធនាំចូលរបស់ព្រះរាជាណាចក្រកម្ពុជា ក្រោមកិច្ចព្រមព្រៀងបង្កើតតំបន់ពាណិជ្ជកម្មសេរីអាស៊ាន-អូស្រ្តាលី-ណូវ៉ែលហ្សេឡង់។ ផ្លូវធម្មតាទី១ និងទី២ ៨៨%នៃបន្ទាត់ពន្ធគយត្រូវកាត់បន្ថយនៅឆ្នាំ២០២១ សម្រាប់ផ្លូវធម្មតាទី១ និង២០២៤ សម្រាប់ផ្លូវធម្មតាទី២ បញ្ជីវេទយិត ៧%នៃបន្ទាត់ពន្ធគយសរុបត្រូវកាត់បន្ថយដល់ ៥% ក្នុងឆ្នាំ២០២៥។ បញ្ជីវេទយិតខ្ពស់ ប្រទេសកម្ពុជាអាចដាក់ចំនួន ៣.៤៥%នៃបន្ទាត់ពន្ធគយសរុបក្នុងបញ្ជីវេទយិតខ្ពស់។ បញ្ជីលើកលែង ប្រទេសកម្ពុជាអាចដាក់ ១.៥០% នៃបន្ទាត់ពន្ធគយសរុបក្នុងបញ្ជីលើកលែងទូទៅ។
តំបន់ពាណិជ្ជកម្មសេរីរវាង ប្រទេសសមាជិកអាស៊ាន និងប្រទេសឥណ្ឌា(AIFTA)	ច្បាប់និងបទប្បញ្ញតិ្តពាក់ព័ន្ធ ព្រះរាជក្រិត្យលេខ ០២១១/០០៤ ចុះថ្ងៃទី០៩ ខែកុម្ភៈ ឆ្នាំ២០១១ ប្រកាសលេខ ៣៨៩ សហវ.ប្រក ចុះថ្ងៃទី១៥ ខែមិថុនា ឆ្នាំ២០១១ ស្ដីពីការអនុញ្ញាតឲ្យប្រើកម្មវិធីកាត់បន្ថយ ឬ លុបពន្ធនាំចូលរបស់ព្រះរាជាណាចក្រកម្ពុជា ក្រោមកិច្ច ព្រមព្រៀងបង្កើតតំបន់ពាណិជ្ជកម្មសេរីរវាងប្រទេសសមាជិកអាស៊ាន និងប្រទេសឥណ្ឌា។ ផ្លូវធម្មតាទី១ អត្រាពន្ធគយត្រូវកាត់បន្ថយ ចាប់ពីថ្ងៃទី០១ ខែមករា ឆ្នាំ២០១០ ផ្លូវធម្មតាទី២ អត្រាពន្ធគយត្រូវកាត់បន្ថយ ចាប់ពីថ្ងៃទី០១ ខែមករា ឆ្នាំ២០០៩ បញ្ជីវេទយិត អត្រាពន្ធគយត្រូវកាត់បន្ថយ ចាប់ពីថ្ងៃទី០១ ខែមករា ឆ្នាំ២០០៩ ផលិតផលពិសេស ដូចជាៈ ប្រេងដូង កាហ្វេ តែខ្មៅ និងម្រេច ដែលត្រូវកាត់បន្ថយចាប់ពីថ្ងៃទី០១ ខែមករា ឆ្នាំ២០០៩
ភាពជាដៃគូសេដ្ឋកិច្ចគ្រប់ ទូលំទូលាយតំបន់ RCEP	ភាពជាដៃគូសេដ្ឋកិច្ចទូលំទូលាយតំបន់ (RCEP) គឺជាកិច្ចចរចាពាណិជ្ជកម្មសេរី (FTA) មួយដែលត្រូវបានបង្កើតឡើងក្នុងចំណោមប្រទេសទាំង១៦៖មានសមាជិកអាស៊ានទាំង ១០ប្រទេស (ប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម ) និង ប្រទេសទាំងប្រាំមួយទៀត ដែលមានស្រាប់នូវកិច្ចព្រមព្រៀងពាណិជ្ជកម្មសេរីជាមួយអាស៊ាន (FTAs) មានដូចជាប្រទេសអូស្រ្តាលី ចិន ឥណ្ឌា ជប៉ុន កូរ៉េ និងនូវែលសេឡង់។ ទាក់ទងជាមួយនឹង RCEP ទាំងប្រាំមួយ ប្រទេសដែលមិនមែនជាសមាជិកអាស៊ានទាំងនោះត្រូវបានគេស្គាល់ថាជាដៃគូពាណិជ្ជកម្មសេរីអាស៊ាន ( AFPs )។ បន្ទាប់ពីដំណើរត្រៀមរៀបចំ បណ្តាប្រទេសដែលបានចូលរួមបានចាប់ផ្តើមកិច្ចចរចាជាផ្លូវការ នៅក្នុងខែឧសភា ឆ្នាំ២០១៣។ RCEP នឹងគ្របដណ្តប់ការធ្វើពាណិជ្ជកម្មទំនិញ ពាណិជ្ជកម្មសេវាកម្ម ការវិនិយោគ កិច្ចសហប្រតិបត្តិការ សេដ្ឋកិច្ចនិងបច្ចេកទេស កម្មសិទ្ធិបញ្ញា ការប្រកួតប្រជែង ការដោះស្រាយវិវាទ / បញ្ហាផ្លូវច្បាប់ និងបញ្ហារបស់ស្ថាប័ន ព្រមទាំងបញ្ហាផ្សេងទៀតដើម្បីត្រូវបានបញ្ជាក់កំឡុងពេលនៃការចរចានេះ។