ច្បាប់និងបទប្បញ្ញត្តិពាក់ព័ន្ធ

  • អនុក្រឹត្យលេខ ១៧ អនក្រ.បក ចុះថ្ងៃទី២៦ ខែកុម្ភៈ ឆ្នាំ២០២០ ស្តីពីការដាក់ឲ្យប្រើប្រាស់បញ្ជីទំនិញហាមឃាត់ និងទំនិញជាប់កម្រិតកំណត់ (ចូលជាធរមានចាប់ពីថ្ងៃទី០១ ខែមេសា ឆ្នាំ២០២០ តទៅ)
  • អនុក្រឹត្យលេខ ២០៩ អនក្រ.បក ចុះថ្ងៃទី៣១ ខែធ្នូ ឆ្នាំ២០០៧ ស្តីពីការដាក់ឲ្យប្រើប្រាស់បញ្ជីទំនិញហាមឃាត់ និងទំនិញជាប់កម្រិតកំណត់ (និរាករណ៍)
  • អនុក្រឹត្យលេខ ២០៨ អនក្រ.បក ចុះថ្ងៃទី០៨ ខែកញ្ញា ឆ្នាំ២០១១ ស្តីពីការកែសម្រួល លើកំណត់សម្គាល់ II ឧបសម្ព័ន្ធ ២ នៃអនុក្រឹត្យលេខ ២០៩ អនក្រ.បក ចុះថ្ងៃទី៣១ ខែធ្នូ ឆ្នាំ២០០៧ ស្តីពីដាក់ ឲ្យប្រើប្រាស់បញ្ជីទំនិញហាមឃាត់ និងទំនិញជាប់កម្រិតកំណត់ (និរាករណ៍)

និយមន័យ

ទំនិញហាមឃាត់និងទំនិញជាប់កម្រិតកំណត់ គឺជាទំនិញដែលស្ថិតក្រោមលក្ខខណ្ឌលើការនាំចេញ ឬនាំចូល ក្នុងគោលបំណងណាមួយដូចជា៖

  • ការការពារ​សន្តិសុខ​ជាតិ
  • ការការពារ​សណ្តាប់​ធ្នាប់​សាធារណៈ និង​ស្តង់ដារនៃ​​សុភាវធម៌ និង​សីលធម៌
  • ការការពារសុខភាព​ និង​ជីវិត​មនុស្ស​ សត្វ ឬ រុក្ខជាតិ
  • ការការពារ​បេតិកភណ្ឌជាតិ ដែលមាន​តម្លៃ​ខាង​សិល្បៈ ប្រវត្តិសាស្ត្រ ឬ ​បុរាណវត្ថុ​វិទ្យា
  • ការ​អភិរក្ស​ធនធាន​ធម្មជាតិ
  • ការ​តម្រូវ​តាម​បញ្ញត្តិ​នានា​នៃ​ច្បាប់​ណាមួយ​ជាធរមាន​នៃ​ព្រះរាជាណាចក្រកម្ពុជា
  • ការបំពេញ​កាតព្វកិច្ចក្រោម​ធម្មនុញ្ញសហប្រជាជាតិ។

មុខទំនិញ​ជា​កម្មវត្ថុ​នៃការ​ហាមឃាត់ ឬ​ជាប់​កម្រិត​កំណត់​លើការ​នាំចេញ នាំចូល និង​ការ​ដឹកជញ្ជូន ​ឆ្លងកាត់​ ត្រូវបានកំណត់​ក្នុងឧបសម្ព័ន្ធ១ ដល់ ៥ នៃ​អនុក្រឹត្យ​នេះ ដូចខាងក្រោម៖

  • ឧបសម្ព័ន្ធ ១ បញ្ជីទំនិញហាមឃាត់
  • ឧបសម្ព័ន្ធ ២ បញ្ជីទំនិញតម្រូវឱ្យមានការអនុញ្ញាតនាំចេញ ឬនាំចូល
  • ឧបសម្ព័ន្ធ ៣ បញ្ជីទំនិញតម្រូវឱ្យមានវិញ្ញាបនបត្រពីប្រទេសនាំចេញ
  • ឧបសម្ព័ន្ធ ៤ បញ្ជីទំនិញហាមឃាត់ឬតម្រូវឱ្យមានការអនុញ្ញាតឆ្លងកាត់អន្តរជាតិ
  • ឧបសម្ព័ន្ធ ៥ កំណត់ពន្យល់សម្រាប់ការអនុវត្តបញ្ជីទំនិញហាមឃាត់និងទំនិញជាប់កម្រិតកំណត់

កំណត់សម្គាល់

  1. បញ្ជីជាឧបសម្ព័ន្ធ ២ នៃអនុក្រឹត្យនេះ មិនអនុវត្តចំពោះការនាំចេញ ឬនាំចូលដែលគ្មានលក្ខណៈពាណិជ្ជកម្មតាមរូបភាពជា ទំនិញគំរូ សម្ភារប្រើប្រាស់ផ្ទាល់ខ្លួនរបស់អ្នកដំណើរ សម្ភារផ្លាស់ប្តូរលំនៅដ្ឋាន ឬ តាមរូបភាពប្រហាក់ប្រហែល។ ការលើកលែងនេះ មិនគ្របដណ្ដប់លើមុខទំនិញដែលជាប្រភេទមានហានិភ័យខ្ពស់ដល់សុខុមាលភាព សន្តិសុខ និងសុវត្ថិភាពសង្គមឡើយ។
  2. ផលិតផល, សំណាក ឬបំណែក ពីរុក្ខជាតិឬសត្វ ដែលមាន​ចែងក្នុងអនុសញ្ញាពាណិជ្ជកម្មអន្តរជាតិលើប្រភេទរុក្ខជាតិនិងសត្វព្រៃដែលកំពុងរងគ្រោះ (CITES) ត្រូវមានលិខិតអនុញ្ញាតពីអាជ្ញាធរ មានសមត្ថកិច្ច​នៃ​ក្រសួង​កសិកម្ម រុក្ខាប្រមាញ់ និង​នេសាទ ទោះជាមិនមាន​ចែង​ក្នុង​បញ្ជី​ឧបសម្ព័ន្ធ​នៃ​​អនុក្រឹត្យ​​នេះក៏ដោយ។
  3. មុខទំនិញហាមឃាត់ការនាំចូល ដែលមិនអាច​ដាក់បញ្ចូល​ក្នុង​បញ្ជីទំនិញនៃឧបសម្ព័ន្ធ ១ ឬមិនអាចញែក​ចេញពីគ្នាបាន​ ដោយសារហេតុផលបច្ចេកទេសនៃតារាងពន្ធគយ មានដូចខាងក្រោម៖
    • រថយន្តចង្កូតស្តាំ
    • ថង់ប្លាសិ្ទចស្ដើងមានដៃយួរ ដែលកម្រាស់តូចជាង ០.០៣ មីល្លីម៉ែត្រ និងរង្វាស់ទទឹងផ្នែកបាតខាងក្រោមតូចជាង ២៥០ មីល្លីម៉ែត្រ
    • មុខទំនិញប្រើប្រាស់រួច រួមមាន សំបកកង់យានយន្ត ​អាគុយ និងថ្មពិល
    • សៀវភៅសាសនា សៀវភៅនយោបាយ ស្នាដៃសិល្បៈ រូបភាពអាសអាភាស រូបភាពពាណិជ្ជកម្ម និងឯកសារបោះពុម្ពផ្សេងទៀត ដែលច្បាប់ហាមឃាត់
    • ទំនិញល្មើសច្បាប់កម្មសិទ្ធិបញ្ញា (IPR Law) ឬ ទំនិញក្លែងក្លាយ។
  4. មុខទំនិញជាប់កម្រិតកំណត់លើការនាំចូល ដែលមិនអាចដាក់បញ្ចូលក្នុងបញ្ជីទំនិញនៃឧបសម្ព័ន្ធ ២ ដោយ​​សារហេតុផលបច្ចេកទេសនៃតារាងពន្ធគយ មានដូចខាងក្រោម៖
    • ទំនិញប្រើប្រាស់រួច រួមមាន កុំព្យូទ័រ ស្បែកជើង កាបូប ម៉ាស៊ីនត្រជាក់ ទូរទឹកកក និងទូក្លាស្សេ (ស្ថិតក្រោមសមត្ថកិច្ចរបស់ក្រសួងបរិស្ថាន)
    • ការនាំចូលដ្រូនក្រៅពីប្រភេទនៃ​ទីតាំង​រងលេខ  8802.20.90 និង 8802.30.90 ត្រូវ​មាន​លិខិត​អនុញ្ញាត​ពីក្រសួង​ប្រៃសណីយ៍និងទូរគមនាគមន៍។
  5. ការនាំចេញនាំចូលមុខទំនិញ ដែលស្ថិតក្រោមការគ្រប់គ្រងរបស់ក្រសួងមានសមត្ថកិច្ចលើសពីមួយ ត្រូវមាន​ការ​​អនុញ្ញាតពីក្រសួង​មាន​សមត្ថកិច្ចណាមួយក៏បាន ដោយផ្អែក​លើ​គោលដៅនៃការ​ប្រើប្រាស់​ទំនិញ លើកលែងតែមុខទំនិញក្នុងបន្ទាត់ពន្ធនៃជំពូក៤៤ នៃបញ្ជីឧបសម្ព័ន្ធ ២ នៃអនុក្រឹត្យនេះ។
  6. ប្រសិនបើមានការអនុញ្ញាតឱ្យនាំចូលពីក្រុមប្រឹក្សាអភិវឌ្ឍន៍​កម្ពុជារួចហើយ ការនាំចូលអាចធ្វើទៅបាន​ដោយពុំចាំបាច់មានការអនុញ្ញាតពីក្រសួង ឬស្ថាប័នមានសមត្ថកិច្ចទៀតឡើយ។
  7. ការនាំចេញធនធានរ៉ែ ត្រូវមានអាជ្ញាបណ្ណ ឬលិខិតអនុញ្ញាតក្នុងទម្រង់ប្រហាក់ប្រហែល ពីក្រសួង​រ៉ែនិងថាមពល។
  8. ចំពោះការនាំចេញទូទៅ ប្រសិនអ្នកនាំចេញមានតម្រូវការប្រើប្រាស់ “វិញ្ញាបនបត្រ” ក្នុងទម្រង់កំណត់ណាមួយនោះ ក្រសួង/ស្ថាប័ន​មាន​សមត្ថកិច្ចពាក់ព័ន្ធត្រូវចេញ​ឯកសារ​ទាំងនោះ តាមការស្នើសុំរបស់​ធុរជន ទោះបីមុខទំនិញនោះពុំមានចែងក្នុងបញ្ជីឧបសម្ព័ន្ធនៃអនុក្រឹត្យនេះក៏ដោយ។

បទប្បញ្ញត្តិនៃអនុក្រឹត្យ

មាត្រា ១.-

ត្រូវបានដាក់ឱ្យ​ប្រើប្រាស់បញ្ជីទំនិញហាមឃាត់និងទំនិញជាប់កម្រិតកំណត់ តាមតារាងពន្ធគយកម្ពុជាឆ្នាំ២០១៧ ជាធរមាន ដូចមានចែងក្នុងឧបសម្ព័ន្ធនៃអនុក្រឹត្យនេះ។

មាត្រា ២.-

ក្រសួងសេដ្ឋកិច្ចនិងហិរញ្ញវត្ថុ ត្រូវធ្វើបច្ចុប្បន្នភាពលេខកូដទំនិញ ក្នុងបញ្ជីជាឧបសម្ព័ន្ធនៃអនុក្រឹត្យនេះឱ្យ​បាន​ទាន់​ពេលវេលា ស្របតាម​ការផ្លាស់ប្តូរប្រព័ន្ធសុខដុមនីយកម្មរបស់អង្គការគយពិភពលោក (WCO HS) និងការផ្លាស់ប្តូរនាមវលីនៃតារាងពន្ធគយស៊ីចង្វាក់របស់អាស៊ាន (AHTN)​​​​​​​​​​​​​​​។

មាត្រា ៣.-

មុខទំនិញ​ជា​កម្មវត្ថុ​នៃការ​ហាមឃាត់ ឬ​ជាប់​កម្រិត​កំណត់​លើការ​នាំចេញ នាំចូល និង​ការ​ដឹកជញ្ជូន ​ឆ្លងកាត់​ ត្រូវបានកំណត់​ក្នុង​អនុក្រឹត្យ​នេះ។​ ការ​កែសម្រួលមុខទំនិញ និង/ឬ ​ប្រព្រឹត្តកម្មនៃទំនិញហាមឃាត់និងទំនិញជាប់កម្រិតកំណត់ ត្រូវធ្វើឡើងក្នុងក្របខណ្ឌ​គណៈកម្មាធិការគោលនយោបាយសេដ្ឋកិច្ចនិងហិរញ្ញវត្ថុ។

មាត្រា ៤.-

ក្នុង​ករណីមាន​ហានិភ័យ​ដែល​តម្រូវ​ឱ្យមាន​ចំណាត់ការ​បន្ទាន់ជា​យថាហេតុ ក្រសួង​មានសមត្ថកិច្ចពាក់ព័ន្ធ​អាចដាក់វិធានការជាបណ្តោះអាសន្ន​ក្នុងការគ្រប់គ្រងការនាំចេញ នាំចូល ឬការ​ឆ្លងកាត់​នៃមុខទំនិញដែលមាន​ហានិភ័យ ទោះបី​ពុំមានចែង​ក្នុង​អនុក្រឹត្យ​នេះក៏ដោយ និងត្រូវ​បញ្ជាក់​​ឱ្យ​បាន​ច្បាស់លាស់​នូវរយៈពេល​នៃការអនុវត្តវិធានការទាំងនោះ  ដោយ​មិនឱ្យលើស​ពី ០៦ ខែ។ ​វិធានការ​បណ្តោះអាសន្នទាំងនោះ អាចត្រូវបញ្ចប់​មុនកាល​កំណត់ ឬ​ពន្យារពេល តាម​ស្ថានភាព​ជាក់ស្តែង។

មាត្រា ៥.-

អនុក្រឹត្យលេខ ២០៩ អនក្រ.បក ចុះថ្ងៃទី៣១ ខែធ្នូ ឆ្នាំ២០០៧ ស្តីពី ការដាក់ឱ្យប្រើប្រាស់បញ្ជីទំនិញហាមឃាត់ និងទំនិញជាប់កម្រិតកំណត់ និងអនុក្រឹត្យលេខ ២០៨ អនក្រ.បក ចុះថ្ងៃទី០៨ ខែកញ្ញា ឆ្នាំ២០១១ ស្ដីពីការកែសម្រួលលើកំណត់សម្គាល់ II នៃឧបសម្ព័ន្ធ២ នៃអនុក្រឹត្យលេខ២០៩ អនក្រ.បក ចុះថ្ងៃទី៣១ ខែធ្នូ ឆ្នាំ២០០៧ និងបទប្បញ្ញត្តិទាំងឡាយណាដែលផ្ទុយនឹងអនុក្រឹត្យនេះ ត្រូវទុកជានិរាករណ៍។

មាត្រា ៦.-

រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ រដ្ឋមន្រ្តីគ្រប់ក្រសួង និងប្រធានគ្រប់ស្ថាប័នពាក់ព័ន្ធ ត្រូវទទួលបន្ទុកអនុវត្តអនុក្រឹត្យនេះតាមភារកិច្ចរៀងៗខ្លួនចាប់ពីថ្ងៃទី០១ ខែមេសា ឆ្នាំ២០២០ តទៅ។