នារសៀលថ្ងៃព្រហស្បតិ៍ ២រោច ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹង​ថ្ងៃទី២១ ខែកុម្ភៈ​ ឆ្នាំ២០១៩ នៅ​សណ្ឋាគារសាន់វ៉េ មាន​រៀបចំកិច្ចប្រជុំលើកទី២របស់ក្រុមអនុវត្តគម្រោង​បញ្ជរ​តែមួយជាតិ​ក្រោម​​​អធិបតីភាព​ដ៏​ខ្ពង់ខ្ពស់ របស់ឯក​ឧត្តម​​​​បណ្ឌិត គុណ ញឹម ប្រតិភូរាជរដ្ឋាភិបាល​ទទួល​បន្ទុក​ជាអគ្គ​នាយក​​​នៃអគ្គនាយកដ្ឋានគយនិងរដ្ឋាករកម្ពុជា ជាអនុប្រធានអចិន្រ្តៃយ៍​នៃ​គណៈកម្មាធិការ​​ដឹកនាំ​គម្រោង​បញ្ជរ​តែ​មួយជាតិ និងជា​ប្រធាន​ក្រុមអនុវត្តគម្រោងបញ្ជរតែមួយជាតិ ដោយមាន​ការអញ្ជើញ​ចូលរួម​ពីសមាស​ភាព​អនុប្រធាន និង​សមាជិកនៃ​ក្រុមអនុវត្ត​គម្រោង ​ដែល​ជា​មន្រ្តីតំណាងក្រសួង-ស្ថាប័ន​ជំនាញពាក់ព័ន្ធ​រួម​មាន​ ក្រសួងពាណិជ្ជកម្ម ក្រសួងសុខាភិបាល ក្រសួងកសិកម្ម រុក្ខាប្រមាញ់ និងនេសាទ ក្រសួង​ឧស្សាហកម្មនិងសិប្បកម្ម ក្រសួងរ៉ែនិងថាមពល ក្រសួងប្រៃសណីយ៍​និង​ទូរគមនាគមន៍ ធនាគារ​ជាតិ​នៃកម្ពុជា ក្រុម​ប្រឹក្សា​អភិវឌ្ឍន៍​​​​កម្ពុជា កំពង់​ផែស្វយ័ត​ក្រុង​ព្រះ​​សីហនុ​ កំពង់​ផែ​ស្វយ័តភ្នំពេញ ​អ្នកជំនាញ​នៃ​ក្រុមហ៊ុនជាប់កិច្ចសន្យាទទួលអនុវត្ត​គម្រោង vCargo Cloud Pte Ltd (VCC) ព្រមទាំងថ្នាក់ដឹកនាំ និង​មន្រ្តី​គយនិងរដ្ឋាករ សរុប​ប្រមាណ​​ចំនួន ៦០ នាក់។​

កិច្ច​ប្រជុំ​នេះ ត្រូវ​បាន​ធ្វើ​ឡើង​បន្ទាប់ពី​​​សិក្ខាសាលា​​ស្តីពី​ការបង្ហាញមុខងារប្រព័ន្ធ (System Demonstration) ពាក់ព័ន្ធនឹងការចេញ​អាជ្ញាប័ណ្ណ​ វិញ្ញាបនបត្រ​ ឬលិខិត​អនុញ្ញាត ក្នុងប្រព័ន្ធបញ្ជរតែមួយ​ជាតិដំណាក់កាលទី២ បានប្រព្រឹត្តទៅរយៈពេលមួយព្រឹក នាថ្ងៃទី២១ ខែកុម្ភៈ ឆ្នាំ២០១៩ នេះផងដែរ។ គោលបំណង​សំខាន់នៃកិច្ចប្រជុំនេះ គឺដើម្បីតាមដានវឌ្ឍនភាព​ការអភិវឌ្ឍ​ប្រព័ន្ធបញ្ជរ​តែ​មួយ​ជាតិ​ដំណាក់កាល​ទី២ និង បន្តពិនិត្យ ពិភាក្សា និងផ្តល់ធាតុចូល​បន្ថែមលើ​ការងារពាក់​ព័ន្ធ​នឹង​ប្រព័ន្ធ​បញ្ជរតែមួយជាតិ​ដំណាក់កាលទី២។ ទន្ទឹមនេះ កិច្ចប្រជុំ ក៏បានពិនិត្យការបង្ហាញមុខងារ​នៃប្រព័ន្ធ​បញ្ជរ​តែមួយ​​ជាតិ​ដំណាក់កាល​ទី២​នេះ ដែលក្រុមហ៊ុន VCC បានអភិវឌ្ឍរួចស្រប​តាម​ការ​អនុវត្ត​ល្អ​ជា​អន្តរជាតិ។

ឯកឧត្តម​បណ្ឌិត​ប្រតិភូរាជរដ្ឋាភិបាល ​បានវាយតម្លៃខ្ពស់អំពីលទ្ធផល​ការងារ​ដែល​សម្រេច​បាន​នា​ពេល​​កន្លងមក និង​​បាន​ស្នើឱ្យតំណាងក្រសួង-ស្ថាប័នជំនាញទាំងអស់ត្រៀមខ្លួនចូលរួមធ្វើការ​សាកល្បង​​ប្រើប្រាស់​ប្រព័ន្ធបញ្ជរតែមួយជាតិដំណាក់កាលទី២នេះ ដែល​នឹងចាប់ផ្តើមក្នុងអំឡុងចុងខែមីនា ឆ្នាំ២០១៩ ខាងមុខ​នេះ និង​បានស្នើឱ្យ​ក្រុមការងារ​ពិនិត្យ​ទិដ្ឋភាព​​ច្បាប់​ដើម្បី​គាំទ្រ​ដល់ការអនុវត្តគម្រោង​បញ្ជរ​តែមួយជាតិ​ដំណាក់កាលទី២។ ​ឆ្លៀត​ក្នុង​ឱកាស​នេះ ឯកឧត្តម​ក៏បាន​លើក​ឡើង​ពី​ការណែនាំ​របស់​ឯកឧត្តម​អគ្គបណ្ឌិត​សភាចារ្យ​ឧបនាយករដ្ឋមន្ត្រី​ក្នុង​ការ​ស្នើ​​ជំរុញ​ពន្លឿន​ការងារ​អភិវឌ្ឍន៍​ប្រព័ន្ធ​បញ្ជរតែមួយ​ជាតិ ឲ្យ​បញ្ចប់​បាន​ឆាប់​តាម​ដែល​អាចធ្វើទៅបាន​ដើម្បី​ឲ្យ​​ទាន់​សភាព​ការណ៍​នៃ​ការ​​កែទម្រង់​ថ្មីៗ​ពាក់ព័ន្ធ​នឹង​កិ​ច្ច​សម្រួល​ពាណិជ្ជកម្ម​នៅ​តាម​ព្រំដែន។ ជាកិច្ច​បញ្ចប់ ឯកឧត្តម​បណ្ឌិត​ប្រតិភូរាជរដ្ឋាភិបាល ក៏បាន​ថ្លែង​​អំណរគុណ​ដល់​តំណាង​ក្រសួង-ស្ថាប័នជំនាញ​ពាក់ព័ន្ធ​ ដែល​បាន​​សហការ​និងការគាំទ្រ​ជា​វិជ្ជមា​ន​​​​​នាពេលកន្លងមក និង​​បានណែនាំ​​ឱ្យ​សមាជិក​នៃ​ក្រុមអនុវត្ត​គម្រោង​បញ្ជរតែ​មួយ​​ជាតិ​ទាំង​អស់ ​​​បន្តប្រឹង​ប្រែង​​ចូលរួមសហការ​ឱ្យ​បាន​​សកម្មបន្ថែម​ទៀត ដើម្បី​គម្រោង​បញ្ជរ​តែមួយ​ជាតិ​ដំណាក់​កាលទី២ អាចសម្រេចបានតាម​ពេលវេលា​ដែលបាន​គ្រោង​ទុក សំដៅ​សម្រួល​ពាណិជ្ជកម្ម​ និងពង្រឹងភាពប្រកួតប្រជែងរបស់កម្ពុជាបន្ថែម​ទៀត។

កិច្ចប្រជុំនេះ​ បាន​​បញ្ចប់​នៅ​វេលាម៉ោង​ ១៧:៣០ ល្ងាច ​ នា​ថ្ងៃ​ខែឆ្នាំ​ដដែល ប្រកប​ដោយ​បរិយាកាស​​​​​រីករាយ និងទទួល​បាន​​លទ្ធផល​ប្រកប​​ដោយ​​ផ្លែផ្កា​គួរ​​ឱ្យ​កត់​​​សម្គាល់​។

photo_2019-02-22_09-43-18 photo_2019-02-22_09-43-33 photo_2019-02-22_09-43-45 photo_2019-02-22_09-43-50 photo_2019-02-22_09-43-55 photo_2019-02-22_09-44-00

 

ព័ត៌មាននិងព្រឹត្តិការណ៍ផ្សេងៗទៀត