នាថ្ងៃអង្គារ ២កើត ខែកត្តិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៩ ខែតុលា ឆ្នាំ២០១៩ អគ្គនាយកដ្ឋាន​គយនិងរដ្ឋាករកម្ពុជា នៃក្រសួងសេដ្ឋកិច្ចនិងហិរញ្ញវត្ថុ បានរៀបចំកិច្ចប្រជុំក្រុមការងារអាស៊ាន​ស្តីពីនីតិវិធីគយ​និងកិច្ចសម្រួលពាណិជ្ជកម្មទី២៧ ដោយមានការចូលរួមពីប្រតិភូរដ្ឋបាល​គយ​អាស៊ាន​​​ទាំង១០​,លេខាធិការដ្ឋាន​អាស៊ាន, ក្រុមប្រឹក្សាពាណិជ្ជកម្មអាស៊ាន-អឺរ៉ុប (EU-ABC) និងវិទ្យាស្ថាន​ស្រាវជ្រាវ​សេដ្ឋកិច្ច​សម្រាប់អាស៊ាននិងអាស៊ីខាង​កើត​ (Economic Research Institute for ASEAN and East Asia- ERIA)។ លោក នួន ច័ន្ទរិទ្ធ អគ្គនាយករង​​នៃ​អគ្គនាយកដ្ឋានគយនិងរដ្ឋាករកម្ពុជា ជាតំ​ណាង​​ដ៏ខ្ពង់ខ្ពស់របស់ឯកឧត្តមបណ្ឌិត គុណ ញឹម ប្រតិ​ភូរា​ជ​រដ្ឋាភិបាលទទួលបន្ទុកជាអគ្គនាយក នៃអគ្គនា​យ​ក​ដ្ឋានគយនិង​​រដ្ឋាករកម្ពុជា បានចូលរួមជាអធិបតីភាពក្នុងពិធីបើកក្នុងនាមជាប្រទេសម្ចាស់ផ្ទះជាមួយលោក Lee Boon Chong ប្រធានក្រុមការងារអាស៊ានស្តីពីនីតិវិធីគយនិងកិច្ចសម្រួលពាណិជ្ជកម្ម​និង​ជាជំនួយការ​ជាន់​ខ្ពស់​​នៃ​រដ្ឋបាលគយ​សឹង្ហបុរី​ដែលជាប្រធាននៃកិច្ចប្រជុំ។

កិច្ចប្រជុំក្រុមការងារអាស៊ានស្តីពីនីតិវិធីគយ​និង​កិច្ចសម្រួលពាណិជ្ជកម្ម​ទី២៧ ប្រព្រឹត្តទៅរយៈពេល៣ថ្ងៃ ចាប់ពីថ្ងៃទី២៩ ដល់៣១ ខែតុលា ឆ្នាំ២០១៩ នៅសណ្ឋាគារ Sunwayទី​ក្រុងភ្នំពេញ ​ក្នុងគោលបំណង​ដើម្បី​ពិនិត្យ និងពិភាក្សាលើវឌ្ឍនភាព នៃការអនុវត្តផែនការយុទ្ធសាស្រ្ត អភិវឌ្ឍគយ និងការងារ​សមាហរណកម្ម​គយអាស៊ាន។

ក្នុងពិធីបើកកិច្ចប្រជុំក្រុមការងារអាស៊ានស្តីពីនីតិវិធីគយនិងកិច្ចសម្រួលពាណិជ្ជកម្មទី២៧លោកអគ្គនាយករង នៃអគ្គនាយកដ្ឋានគយនិងរដ្ឋាករកម្ពុជា បានលើកពីជោគជ័យរបស់ប្រទេសអាស៊ាន​ក្នុងការទាក់ទាញ​វិនិយោគ​ផ្ទាល់បរទេស (FDI), ជំរុញកំណើនទំហំពាណិជ្ជកម្ម និងការលើកកម្ពស់ឧត្តមភាព ប្រកួត​ប្រជែងសេដ្ឋកិច្ចក្នុងតំបន់និងពិភពលោក  បន្ទាប់ពីការបង្កើតសហគមន៍សេដ្ឋកិច្ចអាស៊ាន ២០១៥។ លោកអគ្គនាយករងគយនិងរដ្ឋាករកម្ពុជា ក៏បានលើកឡើងពីសមិទ្ធផល ដែលរដ្ឋបាលគយអាស៊ានបាន​ចូ​ល​រួម​​​ចំណែក​ក្នុងការលើកកម្ពស់កិច្ចសម្រួលពាណិជ្ជកម្ម និងលើកទឹកចិត្តឱ្យកិច្ចប្រជុំក្រុមការងារអាស៊ាន​ស្តីពី​នីតិវិធីគយនិងកិច្ចសម្រួលពាណិជ្ជកម្ម បន្ដខិតខំអនុវត្តផែនការអភិវឌ្ឍគយ សមាហរណកម្មគយអាស៊ាន ដើម្បីសម្រេចគោលដៅរបស់ប្រមុខរដ្ឋាភិបាលអាស៊ានដែលបានកំណត់ ។ ទន្ទឹមនេះ លោក Lee Boon Chong បានលើកឡើងពីវឌ្ឍនភាពដែលអាស៊ានបានធ្វើក្នុងកំឡុងពេល ៥ ឆ្នាំ និងបានថ្លែងកោតសរសើរពី​ក្រុមការងារ​នីតិវិធីគយនិងកិច្ចសម្រួលពាណិជ្ជកម្ម សម្រេចបានស្របតាមផែនការការងារឆ្នាំ២០១៩​ ផង​ដែរ។

ជាកិច្ចបញ្ចប់ លោក នួន ច័ន្ទរិទ្ធ ក៏បានលើកទឹកចិត្តឱ្យកិច្ចប្រជុំក្រុមការងារអាស៊ានស្តីពីនីតិវិធីគយនិងកិច្ច​សម្រួល​ពាណិជ្ជកម្ម បន្តពិភាក្សានិងជំរុញអនុវត្តការងារមួយចំនួន​រួមមាន ការផ្តល់សច្ចាប័នលើពិធីសារទី២​ស្តីពីការកំណត់ច្រកទ្វារព្រំដែនឆ្លងកាត់ (Protocol 2 on Designation of Frontier Posts),​ការរៀបចំដាក់​ឱ្យអនុវត្ត​សាកល្បងប្រព័ន្ធឆ្លងកាត់គយអាស៊ាន​, ការពិនិត្យនិងធ្វើវិចារណកម្មលើតារាងពន្ធ​គយអាស៊ាន​ឆ្នាំ២០១៧/១ ដើម្បីត្រៀមរៀបចំតារាងពន្ធគយអាស៊ាន​ឆ្នាំ២០២២, ការរៀបចំដាក់ឱ្យអនុវត្តកម្ម​វិធី​ទទួល​ស្គាល់ប្រតិបត្តិករ​សេដ្ឋកិច្ច​​មានការអនុញ្ញាតអាស៊ាន​ (ASEAN Authorized Economic Operators​-Mutual Recognition Arrangements) ជាដើមផងដែរ។

photo_2019-11-01_09-42-06

photo_2019-11-01_09-42-10

photo_2019-11-01_09-42-19

photo_2019-11-01_09-42-01

photo_2019-11-01_09-41-55

photo_2019-11-01_09-42-12

ព័ត៌មាននិងព្រឹត្តិការណ៍ផ្សេងៗទៀត