នារសៀលថ្ងៃព្រហស្បត៏ ៤រោច ខែអស្សុជ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី១៧ ខែតុលា ឆ្នាំ២០១៩ នៅអគ្គនាយកដ្ឋានគយនិងរដ្ឋាករកម្ពុជា (អគរ) មានរៀបចំកិច្ចប្រជុំជាមួយប្រតិបត្តិករផែស្ងួត ភណ្ឌាគារគយមានដែនកំណត់ កំពង់ផែតូចៗតាមសមុទ្រ និងប្រតិបត្តិករដឹកជញ្ជូនទំនិញនាំចេញ-នាំចូលនៅកម្ពុជា ក្រោមអធិបតីភាព ឯកឧត្ដមបណ្ឌិត គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានគយនិងរដ្ឋាករ​កម្ពុជា និងមានការចូលរួមពីប្រធាន និងតំណាងប្រតិបត្តិករពាក់ព័ន្ធ ព្រមទាំងមានការចូលរួមដោយថ្នាក់ដឹកនាំ និងមន្ត្រី​គយនិងរដ្ឋាករពាក់ព័ន្ធ។ កិច្ចប្រជុំនេះមានគោលបំណងស្វែងរកបាតុភាពអសកម្ម និងបញ្ហាប្រឈមនានានៃអាជីវកម្មផែស្ងួត​ ភណ្ឌាគារគយមានដែនកំណត់ ក៏ដូចជាសេវាដឹកជញ្ជូនទំនិញនាំចេញ-នាំចូល នៅកម្ពុជា។

ថ្លែងក្នុងកិច្ចប្រជុំ ឯកឧត្ដមបណ្ឌិត គុណ ញឹម បានគូសបញ្ជាក់អំពីតួនាទីនិងភារកិច្ចស្នូលមួយចំនួនរបស់ អគរ រួមមាន ការប្រមូលចំណូលពន្ធអាករ, ការបង្ការនិងបង្ក្រាបអំពើរត់គេចពន្ធ, ការផ្តល់កិច្ចសម្រួលពាណិជ្ជកម្ម និងការចូលរួម​ចំណែក​លើកស្ទួយសុខមាលភាពប្រជាពលរដ្ឋ ការពារសន្តិសុខនិងសុវត្ថិភាពសង្គម និង​បរិស្ថានផងដែរ។ ក្នុងការអនុវត្ត​តួនាទីនិងភារកិច្ចគន្លឹះទាំងនេះ អគរ តែងខិតខំរក្សានូវតុល្យភាពរវាងការអនុវត្តច្បាប់ និងកិច្ចសម្រួលពាណិជ្ជកម្ម ពោលគឺ​ផ្តល់​ភាពងាយ​ស្រួលដល់ធុរកិច្ចរបស់វិស័យឯកជនពាក់ព័ន្ធ ប៉ុន្តែត្រូវមានអនុលោមភាព និងអនុវត្តកាតព្វកិច្ចនានាស្របតាមច្បាប់ និងបទប្បញ្ញត្តិជាធរមាន។

ឆ្លៀតក្នុងឱកាសនេះ អគរ ក៏បានលើកឡើងពីការប្រែប្រួលនៃបរិស្ថានពាណិជ្ជកម្មអន្តរជាតិ ជាពិសេស​សង្គ្រាម​ពាណិជ្ជកម្ម, និន្នាការនៃការកើនឡើងនៃការការពារនិយម និងឯកតោភាគីនិយម។ ឆ្លើយតបនឹងស្ថានភាពនេះ រាជរដ្ឋាភិ-បាល បានដាក់ចេញនូវគោលនយោបាយ និងវិធានការកែទម្រង់ស៊ីជម្រៅនិងមុតស្រួចនានាជាបន្តបន្ទាប់ ដើម្បីពង្រឹងភាព ប្រកួតប្រជែង និងកែលម្អកិច្ចសម្រួលពាណិជ្ជកម្មរបស់កម្ពុជា។ អគរ ក៏បានបង្ហាញផងដែរនូវខ្លឹមសារលិខិតុបករណ៍​​គតិយុត្តគន្លឹះៗពាក់ព័ន្ធមួយមួយចំនួន ដែលតម្រូវឱ្យប្រតិបត្តិករផែស្ងួត ភណ្ឌាគារគយមានដែនកំណត់ កំពង់ផែតូចៗតាមសមុទ្រ និងប្រតិបត្តិករដឹកជញ្ជូនទំនិញនាំចេញ-នាំចូល មានការជ្រួតជ្រាប និងមានកាតព្វកិច្ចអនុវត្ត ដើម្បីពង្រឹងអនុលោមភាព និងជំរុញការប្រកួតប្រជែងដោយស្មើភាពក្នុងកិច្ចដំណើរការធុរកិច្ច និងឡូជីស្ទីករបស់ខ្លួននៅកម្ពុជា។

ក្រោយពីបានពិភាក្សា និងពិគ្រោះយោបល់លើប្រធានបទពាក់ព័ន្ធមួយចំនួន កិច្ចប្រជុំបានរកដំណោះស្រាយ​បញ្ហាប្រឈម និងសំណូមពរលើការងារមួយចំនួនដូចជា ការជំរុញដំណើរការនៃការដឹកជញ្ជូនឆ្លងកាត់អន្តរជាតិ, ជំរុញដំណើរការនៃការនាំចេញផលិតផលកសិកម្មឱ្យកាន់តែរលូន, ការកំណត់មូលហេតុដែលនាំឱ្យមានការកកស្ទះ​មធ្យោបាយដឹកជញ្ជូនឆ្លងដែននៅមាត់ច្រកសំខាន់ៗមួយចំនួន, និងកត្តានិងមូលហេតុដែលនាំឱ្យថ្លៃដើមនៃការដឹកជញ្ជូនទំនិញនាំចេញ-នាំចូលនៅកម្ពុជាកើនខ្ពស់ ជាដើម។

ចំពោះសំណូមពរ និងបញ្ហាមួយចំនួនដែលនៅសេសសល់មិនទាន់អាចដោះស្រាយបាននាពេលនេះ អង្គប្រជុំ​​សម្រេចនឹងលើកឡើងក្នុងកិច្ចប្រជុំយន្តការភាពជាដៃគូរវាងគយនិងវិស័យឯកជនលើកទី៨ នាថ្ងៃខាងមុខ។

photo_2019-10-11_16-33-32

photo_2019-10-18_14-34-19

photo_2019-10-18_14-34-10

photo_2019-10-18_14-34-45

 

photo_2019-10-18_14-34-25

 

photo_2019-10-18_14-34-53

ព័ត៌មាននិងព្រឹត្តិការណ៍ផ្សេងៗទៀត