នាថ្ងៃទី១៧ ខែកក្កដា ឆ្នាំ២០១៧ វេលាម៉ោង ១៥:០០ រសៀល ឯកឧត្ដមបណ្ឌិត គុណ ញឹម អគ្គ​នា​យ​ក​​នៃ​​​​​​​អគ្គនាយក​ដ្ឋាន​គយ​និង​រដ្ឋាករ​កម្ពុជា (អគរ) បានអនុញ្ញាតឲ្យ​គណៈប្រតិភូរបស់ការិយាល័យផ្នែក​គ្រឿង​ញៀន និង​ឧក្រិដ្ឋក​ម្ម​​​នៃអង្គការ​សហប្រជាជាតិ (UNODC) ដឹកនាំដោយ​លោកស្រី Helene Phan ចូលជួប​ពិភាក្សា​​ការងារ​ពាក់ព័ន្ធ​​​នឹង​ដំណើរ​ការ​របស់​អង្គភាព​ត្រួតពិនិត្យកុងតឺន័រ​ (Container Control Unit-CCU)។​ ​ប្រធាន​បទ​​​​​​សំខាន់ៗ​​នៃកិច្ច​ប្រជុំ រួមមាន៖ (១)​ វឌ្ឍនភាពការងារ និ​ង​បញ្ហាប្រឈមរបស់អង្គភាព​ត្រួតពិនិត្យកុងតឺន័រ​ (CCU) (២)សេចក្តីព្រាងនីតិវិធីប្រតិបត្តិស្តង់ដារ ​(Standard Operating Procedures) (៣)កិច្ច​សហប្រតិបត្តិការជាមួយនឹង​ក្រុមហ៊ុននាវាដឹកជញ្ជូន (Shipping Lines) និង (៤)គម្រោងបង្កើតអង្គភាព​ត្រួតពិនិត្យកុងតឺន័រ​ (CCU​)​ នៅអាកាសយានដ្ឋានអន្តរជាតិភ្នំពេញនាពេលខាងមុខ។

ក្នុង​ជំនួប​នេះលោកស្រី Helene Phan បានរៀបរាប់អំពីវឌ្ឍនភាពការងារ និ​ង​លទ្ធផលវិជ្ជមាននៃការអនុវត្តរបស់​អង្គភាព​ត្រួតពិនិត្យកុងតឺន័រ​ (CCU) និងលទ្ធភាពនៃការពង្រីកគម្រោងសកម្មភាព CCU ទៅដល់អាកាសយានដ្ឋានអន្តរជាតិភ្នំពេញ និងកំពង់ផែអន្តរជាតិភ្នំពេញនាពេលអនាគត។ ជាមួយគ្នានេះដែរ លោកស្រីក៏បានជម្រាបពីបញ្ហា​ប្រឈមមួយចំនួនរួមមាន៖ ការគ្រប់គ្រងបុគ្គលិក​របស់អង្គភាព​ត្រួតពិនិត្យកុងតឺន័រ ​​(CCU)​​ យន្តការសម្របសម្រួលសម្រាប់ផ្លាស់ប្តូរ​ព័ត៌មានទាន់ពេល កិច្ចសហការក្នុងការត្រួតពិនិត្យកុងតឺន័រដែលមានហានិភ័យខ្ពស់ និងយន្តការការអនុវត្តច្បាប់ ដើម្បីសុំការគាំទ្រពី អគរ ក្នុងការបង្កើនប្រសិទ្ធភាពនៃការអនុវត្តរបស់អង្គភាពត្រួតពិនិត្យកុងតឺន័រ (CCU)។

ជាកិច្ចឆ្លើយតប ឯកឧត្តមបណ្ឌិត​ គុណ ញឹម បាន​សម្តែង​ការស្វាគមន៍ និងកោតសរសើរ ចំពោះលទ្ធផ​ល​ជាវិជ្ជមានជាច្រើននៃការអនុវត្ត CCU បន្ទាប់ពីការដាក់ឲ្យដំណើរការនៅ​​កំពង់ផែអន្តរជាតិ​ក្រុង​ព្រះសីហនុ កាលពីថ្ងៃទី១៧ ខែឧសភា ឆ្នាំ២០១៧​ កន្លងមកនេះ។ ​ទន្ទឹមនេះ ឯកឧត្តមបណ្ឌិតក៏បានគាំទ្រនូវសំណើនានា ដែលបានលើកឡើងដោយ​លោកស្រី Henlen Phan ដើម្បីពង្រឹងប្រសិទ្ធភាពការងារ CCU ដែលការងារនេះជាយន្តការមួយដ៏មានសារៈសំខាន់ក្នុងការចូលរួម​ទប់ស្កាត់ បង្ការ បង្ក្រាបបទល្មើសគយ និងបទឧក្រិដ្ឋកម្មឆ្លងដែននានាផងដែរ។ ឆ្លៀតក្នុងឱកាសនេះ ឯកឧត្តមបណ្ឌិត គុណ ញឹម ក៏បានថ្លែងអំណរគុណដល់ UNODC ចំពោះ​ការ​ពង្រឹង​​កិច្ចស​ហ​ប្រតិបត្តិ​​ការ​​ជាមួយ អគរ ជាពិសេសចំពោះគំនិតផ្តួចផ្តើមក្នុងការពង្រីកគម្រោង CCU នៅអាកាសយានដ្ឋានអន្តរជា​តិ​ភ្នំពេញ និងកំពង់ផែអន្តរជាតិភ្នំពេញនាពេលអនាគតផងដែរ។

photo_2017-07-18_13-09-07 photo_2017-07-18_13-09-23

ព័ត៌មាននិងព្រឹត្តិការណ៍ផ្សេងៗទៀត