នារសៀលថ្ងៃអង្គារ ៤កើត ខែពិសាខ  ឆ្នាំកុរ ឯកស័ក ព.ស.២៥៦២ ត្រូវនឹងថ្ងៃទី០៧ ខែឧសភា ឆ្នាំ២០១៩ វេលាម៉ោង ០២:៣០នាទី រសៀល នៅសណ្ឋាគារសាន់វ៉េ អគ្គនាយកដ្ឋានគយនិងរដ្ឋាករគយកម្ពុជា ​(អគរ) បានសម្របសម្រួលដឹកនាំ និងរៀបចំសិក្ខាសាលាស្តីពីការពិនិត្យលទ្ធផលនៃការសាកល្បងមុខងារ ប្រព័ន្ធបញ្ជរតែមួយជាតិដំណាក់កាលទី២ ដោយមាន​ការអញ្ជើញ​ចូលរួម​ពីសមាស​ភាព​អនុប្រធាន និង​សមាជិកនៃ​ក្រុមអនុវត្ត​គម្រោងដែល​ជា​មន្រ្តីតំណាងក្រសួង-ស្ថាប័ន​ជំនាញពាក់ព័ន្ធ​រួម​មាន​ ក្រុម​ប្រឹក្សា​អភិវឌ្ឍន៍​​​​កម្ពុជា ក្រសួងសាធារណការនិងដឹកជញ្ជូន ក្រសួងពាណិជ្ជកម្ម ក្រសួងសុខាភិបាល ក្រសួងកសិកម្ម រុក្ខាប្រមាញ់និងនេសាទ ក្រសួង​ឧស្សាហកម្មនិងសិប្បកម្ម ក្រសួងប្រៃសណីយ៍និងទូរគមនាគមន៍ ក្រសួងរ៉ែ និងថាមពល ធនាគារជាតិនៃកម្ពុជា កំពង់ផែស្វយ័តក្រុងព្រះសីហនុ កំពង់ផែស្វយ័តភ្នំពេញ និង​​អ្នកជំនាញ​នៃ​ក្រុមហ៊ុនជាប់កិច្ចសន្យាទទួលអនុវត្ត​គម្រោង vCargo Cloud Pte Ltd (VCC) ព្រមទាំង ថ្នាក់ដឹកនាំ និង​មន្រ្តី​គយនិងរដ្ឋាករ សរុប​ប្រមាណ​​ចំនួន ៨០ រូប។​ សិក្ខាសាលានេះ មានគោលបំណង ដើម្បីពិនិត្យពិភាក្សា​លើ​លទ្ធផលនៃការធ្វើតេស្ត​សាកល្បងមុខងារ​​ប្រព័ន្ធ និង​ពិនិត្យពិភាក្សាទៅលើ​ការ​ត្រៀមដាក់ឱ្យដំណើរ ការសាកល្បង (Soft Launch) ​​ប្រព័ន្ធបញ្ជរតែមួយជាតិដំណាក់កាលទី២។

​ក្រោយ​ពី​ស្តាប់លទ្ធផល​នៃ​ការ​ធ្វើតេស្តសាកល្បងប្រព័ន្ធ​បញ្ជរតែមួយជាតិ​ដំណាក់កាលទី២  អង្គសិក្ខាសាលា ​បាន​ពិភាក្សា និងផ្តល់ធាតុចូល​បន្ថែម​លើ​ការ​អភិវឌ្ឍ​ប្រព័ន្ធ ដូចជាបញ្ហាបច្ចេកទេសនានា របស់មុខងារប្រព័ន្ធពាក់ពន្ធនឹងការចេញអាជ្ញាប័ណ្ណ វិញ្ញាបនបត្រ ឬលិខិតអនុញ្ញាត សម្រាប់ទំនិញនាំចេញ/នាំចូល និង​ពិនិត្យលទ្ធភាព​ជ្រើសរើសក្រសួង-ស្ថាប័នជំនាញសម្រាប់​ត្រៀមចូលរួម​ចាប់ផ្តើម​អនុវត្ត​សាកល្បង​ (Soft Launch) ដែល​គ្រោង​នឹង​ចាប់ផ្តើម​នា​ខែ​មិថុនា ឆ្នាំ​២០១៩ ខាង​មុខនេះ​។

អនុលោមតាម​ការណែនាំ​ដ៏ខ្ពង់ខ្ពស់របស់​ឯកឧត្តម​អគ្គបណ្ឌិត​សភាចារ្យ អូន ព័ន្ធមុនីរ័ត្ន ​ឧបនាយករដ្ឋមន្ត្រី​ រដ្ឋមន្រ្តីនៃក្រសួងសេដ្ឋកិច្ចនិងហិរញ្ញវត្ថុ និងជាប្រធានគណៈកម្មាធិការដឹកនាំគម្រោង បញ្ជរតែមួយជាតិ ក្នុង​ការ​ស្នើ​​ជំរុញ​ពន្លឿន​ការងារ​អភិវឌ្ឍន៍​ប្រព័ន្ធ​បញ្ជរតែមួយ​ជាតិដំណាក់កាលទី២​ ដើម្បី​កាត់បន្ថយ​ចំណាយ និង​ពេលវេលា​ក្នុង​ការ​ប្រកបធុរកិច្ច តំណាងក្រសួង-ស្ថាប័នជំនាញពាក់ព័ន្ធ​ទាំងអស់​ឯកភាព​នឹង​បន្ត​ជំរុញ​ធ្វើការ​អោយបាន​សកម្ម​ជាមួយ​អ្នក​ជំនាញនៃ​ក្រុមហ៊ុនជាប់កិច្ចសន្យា VCC ក្នុង​ការ​កែលម្អ​ប្រព័ន្ធ​តាម​តម្រូវការ និង​​ត្រៀមនីតិវិធី​​ផ្ទៃក្នុង​តាម​​ក្រសួង-ស្ថាប័ន​រៀងខ្លួន ដើម្បី​អាច​ចូលរួមអនុវត្តសាកល្បងប្រព័ន្ធបញ្ជរតែមួយជាតិដំណាក់កាលទី២នេះ បានតាម​ពេលវេលា​ដែលបាន​គ្រោង​ទុក។

ទន្ទឹមនេះ នៅថ្ងៃពុធ ០៥កើត ខែពិសាខ  ឆ្នាំកុរ ឯកស័ក ព.ស.២៥៦២ ត្រូវនឹងថ្ងៃទី០៨ ខែឧសភា ឆ្នាំ២០១៩  នៅសណ្ឋាគារសាន់វ៉េ ​អគរ ក៏បានសម្របសម្រួលដឹកនាំ និងរៀបចំសិក្ខាសាលាផ្សព្វផ្សាយអំពីវឌ្ឍនភាពនៃការអភិវឌ្ឍប្រព័ន្ធ​បញ្ជរតែមួយជាតិដំណាក់កាលទី២ ជូនចំពោះវិស័យឯកជន ដែល​មាន​សមាសភាពជា​តំណាង​សភាពាណិជ្ជកម្មកម្ពុជា សមាគមភ្នាក់ងារបញ្ជូនទំនិញកម្ពុជា សមាគមដឹកជញ្ជូន ទំនិញផ្លូវគោកកម្ពុជា  សមាគមរោងចក្រកាត់ដេរនៅកម្ពុជា ទីភ្នាក់ងារកូរ៉េសម្រាប់ការជំរុញពាណិជ្ជកម្ម និង វិនិយោគ (KOTRA) សមាគមធុរកិច្ចជប៉ុនប្រចាំនៅកម្ពុជា (JBAC) និង​ធុរជន​ពាក់ព័ន្ធ​ សរុប​ប្រមាណ​​ចំនួន ២០០រូប។​ សិក្ខាសាលានេះ មានគោលបំណងដើម្បីឱ្យវិស័យឯកជនយល់ដឹងអំពីវឌ្ឍនភាពនៃការអភិវឌ្ឍ ប្រព័ន្ធ​បញ្ជរតែមួយជាតិដំណាក់កាលទី២ និងស្វែងយល់ពីអត្ថប្រយោជន៍ដែលនឹងទទួលបានពីការអនុវត្ត គម្រោងប្រព័ន្ធ​បញ្ជរតែមួយជាតិដំណាក់កាលទី២នេះ ក្នុងការ​សម្រួល​ពាណិជ្ជកម្មបន្ថែមទៀត។

1

2

photo_2019-05-08_23-23-29

 

4

photo_2019-05-08_23-42-13

6

7

8

photo_2019-05-08_23-42-20

10

11

12

ព័ត៌មាននិងព្រឹត្តិការណ៍ផ្សេងៗទៀត